Naglab-ot sa masobra 1,100 nga indibidwal kag mga miyembro sang security agencies, ang ginhatagan sang Commission on Elections (Comelec) sang exemption sa nationwide election gun ban.
Mahibaluan nga nagsugod na kahapon ang election gun ban kadungan sang pagsugod sang election period para sa May 12, 2025 National and Local Elections.
Suno kay Comelec Commissioner Aimee Ferolino, may kabug-usan nga 1,131 ka indibidwal kag security agencies ang nahatagan nila sang certificate of exemption sa gun ban.
Ginpasiguro naman ni Ferolino nga nagpabilin sa gihapon nga bukas ang aplikasyon para sa gun ban exemption kag magasarado lamang, duwa ka semana antes matapos ang election period.
Una na nga nagpaandam si Comelec Chairman George Erwin Garcia, nga ang tanan nga mga magalapas sa gun ban ang magapangatubang sa election offense, nga may kabaylo nga silot nga pagkabilanggo sang isa tubtob anom ka tuig nga pagkabilanggo.
Magluwas diri, mahimo man sila nga mapasakaan sang kaso nga paglapas sa Republic Act 10591 ukon The Comprehensive Firearms and Ammunition Regulation Act.
