ROXAS CITY – Naglab-ot sa 115 ka mga colorum nga tricycle nga nagabiyahe sa syudad sang Roxas ang nagkaladakpan sumugod Hunyo 1 tubtob Hunyo 30.
Ini ang ginpahayag ni Mr. Gonzalo A. Andrada Jr., Traffic Management Unit Head sang mainterview sang Bombo Radyo.
Suno diri, hugot sa karon ang ila operasyon bangud madamo na sang mga tricycle drivers nga may prangkisa ukon necessary permit ang nagareklamo bangud wala na sila halos pasahero rason sang madamo nga mga dungol nga nagabiyahe sang colorum nga tricycle.
Dugang pa ni Andrada, awtomatiko ang pag-impound sang mga colorum tricycles nga nagkaladakpan kag magabayad sang penalidad kun sa diin ang 1st offense P1,500, 2nd offense P3,000 kag 3rd offense P5,000 sa idalum sang city ordinance.
Samtang, ginsiling sini nga sa tion mabayaran ang opensa nga ginlapas, gilayon man nga ibalik ang mga tricycle. Pahayag sang TMU Head, adlaw-adlaw ang operasyon sang katapo sang TMU kag may yara man sang plano si Mayor Ronnie Dadivas nga magpahamtang sang task forse kada gab-i agud magbantay kag magpangdakup sang colorum.
Panugyan ni Andrada sa mga nagabiyahe sang colorum, untaton na ang ila pagbiyahe bangud indi ini patas sa mga lehitimo nga mga tricycle drivers, mahimo suno diri mag-apply agud makakuha sang Mayor ‘s permit kag prangkisa kun luyag mangin lehitimo ang pagbiyahe.
