ROXAS CITY – Malipayon nga ginpakigbahin sang chairman sang committee on education nga naglab-ot sa 1,160 karon ka mga estudyante sa kolehiyo nga nagkuluha sang qualifying examination sang Capiz Provincial Government para sa scholarship program ang kwalipikado na kag natalana karon nga magpa-idalum sa interview.
Sa interview sang Bombo Radyo kay Board Member Thea Faith Reyes, ginpahayag sini nga apisar nadelay ang pagpost sa facebook sang Comprehensive Assistance Program for Indentified Scholars ukon CAPIS scholarship secretariat sang mga ngalan sang mga nagkalapasar sa ginhiwat nga qualifying examination para sa scholarship program wala sang kinahanglan nga ikabalaka ang mga bag-o nga scholars bangud pagabayaran kag igahatag sa gihapon sang provincial government ang ila mga ayuda para sa 1st semester sang school year 2023-2024.
Ginpanugyanan man sini ang mga kwalipikado nga mga estudyante nga magtambong sa patigayunon nga interview sa Enero 20-21, 2024 sang scholarship secretariat nga magpadulong gid sa tagsa ka mga LGU.
Yari ang schedule sang patigayunon nga interview sa tagsa ka mga LGU:
Enero 20, 2024 para sa mga kabanwahan sang 2nd District
7:30-9:00 AM
Tapaz and Dumalag – hiwaton sa San Julian Gym (Tapaz)
Dumarao and Cuartero – hiwaton sa Dumarao Civic Center
9:00-10:30 AM
Ivisan and Sapian – hiwaton sa Ivisan Civic Center
1PM Onwards
Dao, Sigma and Mambusao – hiwaton sa Sigma Civic Center
Samtang..
Enero 21, 2024 para sa mga kabanwahan sang 1st District
7:30-9:00 AM
Pilar and Pres. Roxas – hiwaton sa Pres. Roxas Function Hall (Beside 7/11)
Maayon – hiwaton sa Maayon Annex Building sa kilid sang Munisipyo
9:00-10:30 AM
Panitan – hiwaton sa Dadivas Gym
Pontevedra – hiwaton sa Mar Hall
1:00 – 2:30 PM
Panay – hiwaton sa Panay Sports and Community Center
2:30 – 4:00 PM
Roxas City – hiwaton sa Capsu Main (Dadivas Gym)
Panugyan naman ni Reyes sa mga kwalipikado nga mga estudyante nga sa tion nga makasulod na sa scholarship program sang probinsya, halungan gid ang amo nga prebilihiyo pinaagi sa pagtuman sa ordinansa, pagtutom sa pag-eskwela kag pagtuon sang mayo.
