ROXAS CITY – Ginhangkat sang provincial director sang Capiz Police Provincial Office (CPPO) ang 119 ka mga bag-o promote nga mga kapulisan sa probinsiya nga mangin modelo sa ila kapareho nga mga pulis.
Ini ang pahayag ni Police Col. Canilo Fuentes sa iya nga nangin mensahe sa ginpatigayon nga Doning of Ranks para sa Newly Promoted Police Officers sa Capiz PPO.
Suno kay Fuentes nga dapat mangin modelo ang nasambit nga mga pulis sa ila kapareho nga mga kapulisan pinaagi sa paghimo sang maayo kag ipabilin ang tampad nga pagpanerbisyo.
Kinahanglan man suno sa opisyal nga pamatud-an sang mga ini nga wala nagsala ang gobyerno sa pag-promote sa ila pinaagi sa pagpakigbahin sa anuman nga mga lihok kag aktibidad sang hanay sang pulisya, deployment, securities kag law enforcement.
Ginklaro man ni Col. Fuentes nga ang promotion sa mga kapulisan ang indi lamang patimaan sang pagsaka sang sweldo kundi pagdugang man sang responsibilidad.
