Nagsumiter sang ila counter-affidavit ang 12 ka aktibo nga miyembro sang Philippine National Police (PNP) sa National Police Commission (Napolcom) bilang sabat sa administratibo nga reklamo may kaangtanan sa kaso sang mga nadula nga manugbulang nga ginasiling ginpangpatay kag ginpanghaboy sa Taal Lake.
Ang reklamo gin-file ni Julie Patidongan ukon mas kilala sa alyas nga “Totoy”, nga amo ang nagbulgar sang kontrobersyal nga insidente.
Suno sa Napolcom, ginmanduan sang Inspection, Monitoring and Investigation Service (IMIS) ang mga ginatudlo nga pulis nga magsumiter sang sabat sa sulod sang lima ka adlaw halin sang ginpatawag sila sang Hulyo 15.
Suno kay Napolcom Vice Chairman and Executive Officer Rafael Vicente Calinisan, pagatun-an sang IMIS ang mga counter-affidavit kag reklamo agud ma-evaluate ang kabug-usan nga kaso.
Wala pa sang ginpaguwa nga dugang detalye parte sa mga sulod sang affidavit, pero ginpahayag ni Calinisan nga nagpanginwala ang mga pulis nga may kaangtanan sila sa insidente.
Sa karon, Padayon pa ang imbestigasyon kag ginahulat ang resulta sang evaluation sang Napolcom.
