12 ka mga indibidwal, patay sa pagpangluthang sa Johannesburg, South Africa

Nagpatigayon sang massive manhunt ang mga kapulisan sa Johannesburg sa South Africa para sa mga suspetsado sa pagpangluthang nga ginkapatay sang 12 ka mga indibidwal.

Indi magnubo sa 10 ka mga armado nga suspetsado ang involved sa insidente nga nagsulod sa Jumpers Informal Settlements kag hinali nga nagpalupok.

Nagapati naman ang iban nga mga katapo sang Jumpers community nga ang insidente mahimo nga may kaangtanan sa ila pag-inaway sa isa pa ka grupo bangud sa pagmina.

Sa subong, gina-imbestigaran sang otoridad ang motibo sang mga suspetsado sa nasambit nga insidente.