Naglab-ot na sa 12 ang napatay kag walo ang pilason matapos maigo sang Russian drone ang isa ka bus nga may sakay nga mga minero sa rehiyon sang Dnipropetrovsk sa southeastern Ukraine.
Suno sa DTEK group, ang pinakadaku nga pribado nga kompanya sang energy sa Ukraine, kabahin ini sang mas malapad nga pag-atake sang Russia sa mga minahan sang Carbon.
Ginkumpirma man sang gobernador sang rehiyon nga ang insidente natabo sa distrito sang Pavlohrad.
Ginpahayag naman sang isa ka opisyal sang Ukraine nga ang isa ka Shahed drone una nga nag-igo malapit sa bus, nga nagtuga sini sa pagbunggo sa isa ka gate.
Samtang nagapanaug ang mga pasahero, gin-atake pa gid sang ikaduha nga drone ang mga sibilyan.
Bangud sa pag-atake, nagluntad ang sunog, apang madasig ini nga napalong sang mga otoridad kag gindala ang mga pilason sa pinakamalapit nga ospital.
Sa subong, wala pa sang pahayag ang duha ka pungsod angot sa pag-atake.
