Nakatala ang Philippine Institute of Volcanology and Seismology (PHIVOLCS) sang 12 ka pagbuga sang abo sa Kanlaon Volcano sa sulod sang nagligad nga mga adlaw samtang nagapabilin ini sa Alert Level 2.
Suno sa PHIVOLCS, ang 12 ka ash emission nagtiner gikan sa apat tubtob 101 ka minuto. Nakatala man sang 18 ka volcanic earthquakes, lakip ang 11 ka volcanic tremors nga nagtiner sang tatlo tubtob 101 ka minuto.
Nagbuga man ang bulkan sang 979 ka tonelada sang sulfur dioxide kada adlaw sang Hunyo 15, samtang nakita ang plume ukon aso nga naglab-ot sa 700 metros ang kahitaason kag nagpadulong sa west-southwest nga bahin. Nakita man ang paghubag sang bulkan, nga posible nga nagapakita sang pagsaka sang magma sa idalom sini.
Ginalaygayan sang PHIVOLCS ang publiko nga indi magsulod sa sulod sang 4-kilometro nga Permanent Danger Zone bangud sang posible nga kalit nga pagbuga sang abo kag iban pa nga peligro nga may kaangtanan sa aktibidad sang bulkan.
