Nabaton sang 12 ka mga pamilya nga nasunugan sa Sitio Looban, Plaridel Street, Barangay 8, Roxas City sang Hulyo 25 ang ila bag-o nga housing unit sa Tanzaville, Barangay Tanza, Roxas City.
Sa interview sang Bombo Radyo kay Regen Gemolaga, isa sa mga benepisyaryo, iya ginpahayag nga daku ang ila pagpasalamat sa Roxas City Government bangud sa ginhatag sini nga bulig, ilabi na nga wala gid sila sang may nasalbar nga mga gamit sang natabo ang sunog.
Suno kay Gemolaga, madamo man ang nagbulig sa ila samtang yara pa sila sa evacuation center kag padayon ang bulig sa ila agud makabangon halin sa natabo nga kalamidad.
Samtang, nagpasalamat man si Letecia B. Base, isa man ka benepisyaryo, bangud ginhatagan sila sang permanente nga puluy-an.
Suno kay Base, ang ila ginapang-gamit subong amo ang halin mga donasyon.
