Dose ka mga tripulante ang gin-aresto matapos madakpan sa akto nga nagapangisda nga wala sang nagakaigo nga dokumento kag permit sa kadagatan nga sakop sang municipal waters sang Panay, Capiz.
Ang kapitan sang sakayan amo si alyas “Anthony,” 45-anyos, kaupod ang 11 pa niya ka mga crew nga lunsay residente sang Bantayan, Cebu.
Sa interview sa Bombo Radyo kay Police Captain Eric Deocampo, Officer-in-Charge sang Panay Municipal Police Station, iya ginpahayag nga narekober sa operasyon ang isa ka motorbanca nga ginabulubanta nagabalor sang P1.5 million, isa ka diesel engine nga nagabalor sang P300,000, kag kompleto nga set sang lambat kag iban pa nga kagamitan sa pagpangisda nga nagabalor sang P150,000.
Narekober man ang ginabulubanta 450 ka kilo sang nagkalain-lain nga sahi sang isda nga nagabalor sang P90,000.
Sa subong, yara na sa kustodiya sang MENRO-Panay ang mga nadakpan, nga magapangatubang sang kaso may kaangtanan sa paglapas sa Municipal Ordinance No. 03-02 ukon Municipal Fishery Code, Series of 2003, nga nagadumili sang iligal nga pagpangisda sa municipal waters.
