ROXAS CITY – Ginbaha ang 12 ka mga ulumhan sa apat ka mga banwa sa probinsiya sang Capiz bangud sa pag-ulan nga dala sang malain nga lakat sang panahon.
Sa interview sang Bombo Radyo kay Mrs. Judy Grace Pelaez, head sang Provincial Disaster Risk Reduction and Management Office, ginpahayag sini nga kalakip sa mga ulumhan nga ginabaha sa karon amo ang banwa sang Sigma, Panit-an, Cuartero kag Maayon.
Samtang nakabatak ang alert status sang tanan nga Municipal Disaster Risk Reduction and Management Office sa probinsiya kalakip na ang mga response unit, sa diin nagpatigayon na sang inventory sa mga kagamitan nga kinahanglanon sa posible mangin epekto sang pagsulod sang bagyo nga Tisoy sa Philippine Area of Responsibility (PAR).
Ginsuguran naman sang talatapan ang pagmonitor sa mga water levels sa mga kasubaan sa kabanwahanan labi na nga mabaskog nga ulan ang dala sang maabot nga bagyo.
Sa kabug-usan suno kay Pelaez nga nakahanda na ang probinsiya sang Capiz sa mangin epekto sang bagyo sa pihak nga indi naman direkta nga maga-igo ini sa probinsiya.
