CAPIZ- Gindiskyunan kag gin-aprubahan sang 12th Sangguniang Panlalawigan sang Capiz sa pangunahan ni Capiz 1st District Board Member Emmanuel Billones Jr., ang pila ka mga daku nga resolusyon, ordinansa, kag pondo sa ginpatigayun nga Regular Session No. 67 subong nga adlaw, Oktubre 13, 2026, sa Hall of Vice Governors, Capiz Provincial Capitol.
Sa sektor sang ikaayong-lawas kag serbisyo sa publiko, ginlakip sa First Reading ang resolusyon nga gin-author ni Hon. Gilbert O. Ardivilla para sa paghinyo sang donasyon sa PCSO sang Patient Transport Vehicle (PTV), CT Scan Machine, kag mga kagamitang panggamot para sa Sen. Gerardo M. Roxas Memorial District Hospital (SGMRMDH). Ginpahayag man ni Hon. Cesar S. Yap sa Privilege Hour ang kaayohan sang pagpabakuna paagi sa hisgutanon nga “Vaccines Save Lives-and I Believe in Them”, samtang ginhatagan sang pormal nga pagkilala si Mr. Urbellie Ruff Niel B. Batay sang Roxas City matapos makuha ang 8th place sa 2026 Fisheries Professionals Licensure Examination (FPLE).
Dugang pa, ila man gin-aprubahan ang mga pondo kag resolusyon para sa panubli-on kaangay sang Annual Investment Program (AIP) sang Panay para sa CY 2027 (₱40,205,130,678.63), Supplemental AIP No. 4 (₱507,690,000.00), kag ang ₱5.9M nga Supplemental Budget sang Tapaz. Gintun-an man ang dugang nga dokumento sa banwa sang Dao para sa ₱19.55M nga pautang sa Land Bank para sa pagpapasemento sang mga farm-to-market road, subong man ang pagdihon sang “Capiz Safe Schools and Safe Minds Initiative”, pagbag-o sang ngalan sang PHO Wellness Center para mangin “Capiz Wellness Center”, kag ang paghatag sang otoridad kay Gov. Fredenil H. Castro nga magpirma sa mga MOA para sa Student Work Immersion kag OJT Programs sa probinsiya.
