Ginpanindugan ni Senator Imee Marcos nga ginatarget ang subong nga 13-member Senate majority bloc bangud sang serye sang case buildup kag reklamo nga ginapreparar sa ila hanay.
Suno kay Marcos, madugay na sila nga nakabaton sang tawag kag text messages gikan sa Office of the Ombudsman, Department of Justice kag National Bureau of Investigation angut sa ginaalegar ginapreparar nga mga kaso batok sa pila ka mga senador.
Apang suno sa iya, wala niya ginhingadlan kun sin-o ang yara sa likod sang ginpahayag mando sa mga ahensya.
Ginmitlang man sang senador nga sanday Sen. Rodante Marcoleta, Sen. Jinggoy Estrada, Sen. Joel Villanueva, Sen. Francis Escudero kag mag-utod nga sanday Sen. Camille Villar kag Mark Villar bilang pila sa mga ginapahayag may kaangtanan sa mga reklamo.
Lakip man si Ronald dela Rosa nga nagapangatubang sang arrest warrant halin sa International Criminal Court may kaangtanan sa war on drugs sang administrasyon ni former President Rodrigo Duterte.
Dugang pa ni Sen. Imee, posible nga magapangatubang man sang kasubong nga panumbungon si Sen. Bong Go matapos nga ginhingadlan bilang co-perpetrator.
Bangud sini, ginkwestyon ni Marcos kon pamulitika ukon pressure ang nagakatabo sa ila grupo.
Ginpahayag man sini nga nagalaum ang senador nga indi na magpadayon ang anuman nga paghingabot batok sa ila hanay sa tunga sang problema subong sang pungsod.
