KORONADAL CITY – Nag-abot na sa 13 ang patay samtang 8 pa ang padayon nga ginapangita matapos ang nagkalain-lain nga landslide nga ginpaguwa sang mabaskog nga ulan dulot sang Bagyo Inday kag habagat sa Mindanao.
Sa Malapatan, Sarangani, 8 ang napatay kag 2 ang wala pa makita matapos matabunan sang duta ang duha ka mga balay sa Sitio Blesong Fundao, Barangay Poblacion.
Samtang sa Calanogas, Lanao del Sur, 5 ang napatay kag 6 ang padayon nga ginapangita matapos man matabunan sang landslide ang pila ka kabalayan.
Suno sa mga otoridad, posible nga nagpaluya sa duta ang nagligad nga magnitude 7.8 nga linog sa Mindanao, nga nagdugang sa peligro sang landslide bangud sang padayon nga mabaskog nga ulan.
Sa pihak sini, naglab-ot naman sa 18,058 ka pamilya ang apektado sang bagyo kag habagat sa Bangsamoro Region, samtang libo-libo man ang ginpreemptive evacuation sa Negros Occidental bangud sang pagbaha kag hulga sang lahar.
Sa karon gin-anunsyo sang Department of Education ukon DepEd nga kapin 6,100 ka pampubliko nga eskwelahan sa 11 ka rehiyon ang nagsuspender sang face-to-face classes kag nagbalhin sa Flexible Learning Options bangud sang padayon nga indi maayo nga kondisyon sang panahon.
