Malipayon nga nagbaton sang libre nga bugas ang kapin 1,348 ka mga benepisyaryo halin sa walo ka kabarangayan sa banwa sang Pontevedra sa ginpatigayon nga distribusyon subong nga adlaw, Mayo 28, sa Brgy. Binuntucan Covered Gym.
Ang mga benepisyaryo naghalin sa Barangay Binuntucan, Banate, Hipona, Intungcan, Jolongajog, Lantangan, San Pedro kag Yatingan.
Kabahin sa nagbaton sang bulig ang mga 4Ps beneficiaries, mangingisda kag mga mangunguma nga nakabaton sang tig-10 ka kilo nga bugas agud makabulig sa ila adlaw-adlaw nga panginahanglanon kag mapahagan-hagan ang epekto sang pagsaka sang presyo sang mga balaklon bangud sang nagapadayon nga krisis sa enerhiya.
Ang amo nga inisyatibo ginpatigayon pinaagi sa Provincial Social Welfare and Development Office upod ang suporta sang bug-os nga katapo sang Gobyerno Probinsyal sang Capiz.
