ROXAS CITY – Magabaton sang 136 ka mga bag-o nga bumbero ang bug-os nga Rehiyon-6.
Ini ang ginkumpirmar ni Senior Fire Officer 2 Selvino Ross Jr., Public Information Officer sang Roxas City Fire Station sang mainterview sang Bombo Radyo.
Ini matapos nga nagpaguwa sang Memorandum ang ila organisasyon nga nagakinhanglan sang 136 ka mga bakante nga posisyon para sa Hiring kag Selection sang Fire Officer 1.
Suno diri, kinahanglan lamang sang mga aplikante nga magproseso sang mga rekisitos para sa nasambit nga posisyon.
Pila sa nagapanguna nga rekisitos amu ang:
-Nagtapos sang 4-year course
-May yara sang eligibility (CSC, PRC, MARINA)
-Sulod sa minimum height requirement, atleast 5’2” sa lalaki nga aplikante, samtang 5’ sa babayi nga aplikante kag
-Magkuha sang generated QR code pinaagi sa pagbisita sa ila nga portal http://bfp-ers.online/
Nagakinahanglan nga magpadulong sa pinakamalapit nga fire station sa ila lugar agud magiyahan sang mga katapo sang bumbero sa mga dugang pa nga mga dokumento nga kinahanglan i-comply sang aplikante.
Ginahatagan sang plaso tubtob sa Abril 22, sini nga tuig ang pagsumiter sang ila kumpleto nga mga rekisitos. Ginklaro sang BFP nga wala sang bayad ang pag-apply sa ila nga organisasyon kag indi kinahanglan sang mga naga-aspirar sa pagka-bumbero nga kahadlukan ang training.
