ROXAS CITY – Yara na sa kabug-usan nga 136 ka mga barangay sa 16 ka mga banwa ang lubog sa tubig-baha, ba-se sa monitoring sang Provincial Disaster Risk Reduction and Management Office (PDRRMO).
Kalakip sa nakaeksperensya sang pagbaha ang mga kabarangayan sa banwa sang Panay, Dumarao, Dumalag, Pilar, Pontevedra, Sigma, Ivisan, Mambusao, Jamindan, Maayon, Panitan, Cuartero, Sapian, Pres. Roxas, Dumarao, Dao kag Roxas City.
Nagdangat na sa 48 ka mga pamilya apektado sang pagbaha kag 890 ka mga pamilya ukon 4,709 ka mga indibidwal ang yara sa mga evacuation centers sang nagkalain-lain nga mga banwa nga apektado sang pagbaha tuga sang bagyong Agaton.
Base sa pinakaulihi nga report sang PDRRMO may duwa ka mga inbidwal ang nalumos sa banwa sang Pilar kag Mambusao kun sa diin padayon ang search ang rescue operation sang mga awtoridad.
Nauna diri, ginsuspendi ni Mayor Ronnie Dadivas ang klase sang tanan nga level sa pribado ukon pampubliko nga eskwelahan sa syudad sang Roxas.
Samtang, nagpaguwa sang advisory si Gov. Esteban Evan Contreras nga nagakumbensi sa mga pumuluyo nga nagapuyo sa low lying areas nga magpadulong sa mga evacuation centers para sa ila nga kaluwasan.
Sa karun, padayon pa ang monitoring sang PDRRMO sa nasambit nga mga lugar.
