Nagpakigkita kag nagpabutyag sang ila pagpasalamat kay Governor Fredenil H. Castro ang 14 ka bag-o nga napromote nga mga empleyado sang Provincial Planning and Development Office (PPDO) subong nga Martes, Hulyo 7, bangud sang promosyon nga ila nabaton kag sang padayon nga suporta sa ila propesyonal nga pag-uswag sa pagserbisyo sa publiko.
Sa ila pagpakigkita, ginpasalamatan sang Gobernador ang mga empleyado bangud sang ila padayon nga dedikasyon kag matutom nga pag-alagad sa Gobyerno Probinsyal sang Capiz.
Suno kay Castro, ang promosyon sang mga empleyado indi bunga sang pabor kundi resulta sang ila maayo nga performance, pagpangabudlay, kag kapasidad nga mag-angkon sang mas mataas nga responsibilidad sa serbisyo publiko.
Ginpahanumdom man sang Gobernador ang mga napromote nga padayon nga himuon ang ila pinakamaayo sa pagserbisyo sa katawhan kag paninguhaan nga mapadayon ang mataas nga kalidad sang ila trabaho.
Gin-athag man niya nga sa sulod sang Kapitolyo sang Capiz, patas ang pagtratar sa tanan nga empleyado kag pareho ang oportunidad para sa mga nagapakita sang dedikasyon, integridad, kag maayo nga performance sa ila obra.
Ang promosyon sang 14 ka empleyado kabahin sang padayon nga pagpalig-on sang Gobyerno Probinsyal sa merit-based nga pag-uswag sang mga kawani agud mapauswag pa gid ang serbisyo sa publiko.
