ROXAS CITY – Nagalab-ot sa 140 tanan ka pamilya ang gin-evacuate sa probinsiya bangud sa baha nga tuga sang bagyo nga Usman.
Nagdangat na sa 41 ka mga kabaranggayan naggikan sa napulo ka mga kabanwahanan ang lubog sa tubig-baha bangud sang wala untat nga pag-ulan nga dala sang nasambit nga bagyo.
Ba-se sa datos sang Provincial Disaster Risk Reduction and Management Office (PDRRMO-Capiz), nagdangat na sa 12 ka mga barangay ang lubog sa tubig-baha nga sakop sang banwa sang Jamindan; 4 sa Panit-an; 1 sa Maayon; 1 sa Dao; 2 sa Sigma; 2 sa Tapaz; 10 sa Mambusao; 3 sa Dumalag; 2 sa Dumarao; 1 sa Pilar kag 3 sa siyudad sang Roxas.
Nahibaluan nga may pila ka mga barangay roads nga nagapabilin nga indi maagyan sang mga salakyan bangud sang tubig-baha.
Kasunod sini, ginpasiguro naman sang PDRRMO nga nakaalerto na ang mga responding units sang probinsiya kalakip na ang mga rescue teams sa mga kabanwahanan kag mga natungdan nga ahensiya sang gobyerno.
