ROXAS CITY – Dako ang nangin epekto sang coronavirus disease (COVID-19) pandemic sa business sector sa Spain.
Ini ang ginpahayag sang isa ka negosyante sa Madrid, Spain nga si Senior Cesar Gomez sang mainterview sang Bombo Radyo.
Suno diri nagalab-ot sa 15-20 percent ang revenue losses sa ginapanag-iyahan sini nga kompaniya bangud sa nasambit nga pandemya.
Apang sa pihak sang krisis, wala sini ginapabay-an ang ila mga empleyado.
Suno diri, 80 percent sang ila empleyado ang nakawork-from-home samtang ang nabilin nga empleyado ang may yara sang duha ka mga shifts agud malikawan ang close-contact sa mga ini.
Nagpanawagan naman si Seniora Diana Navas sa mga Filipino nga magkooperar sa gobyerno subong nga nagapangatubang sang health crisis.
Suno diri nga importante sa subong nga itugyan naton ang aton pagsalig sa mga otoridad sa pagtapna sang COVID-19 pandemic.
Nagapasalamat man ini bangud may yara sila sang OFW’s nga kaupod sa ila panimalay nga amo ang nagaasikaso sa ila sa pang-adlaw-adlaw.
Ginpahayag naman ni Bombo International Correspondent Jean Degala nga makaluluoy sa karon ang sitwasyon sang pila ka mga Filipino sa pungsod ilabi na ang mga naapektuhan ang ila trabaho.
Apang suno diri may ginapalab-ot naman nga bulig ang gobyerno sa ila kun sa diin duha ka beses sa isa ka semana sila ginahatagan sang relief packs.
