ROXAS CITY – Nagkaisog nga magpalapit sa Bombo Radyo ang 15 anyos nga estudyante sa isa ka secondary public school sa Capiz bangud sa na-eksperyensiyahan sini nga ‘bullying’ sa eskwelahan kasunod sang pag-akusar sa iya nga siya ang babaye sa nagalapta nga sex video sa probinsiya.
Suno kay alyas MJ, pila ka adlaw na siya nga wala nagasulod sa klase bangud indi na sini masarangan ang pag-bully sa iya sang kapareho sini nga mga estudyante.
Emosyunal si MJ sang ginpahayag sini nga ginasinggitan siya sang mga estudyante gikan sa corridor nga si ‘viral girl’ bangud sa nagalapta nga sex video.
Apisar ginapanindugan sini nga indi siya ang babaye sa amo nga video, wala sa gihapon siya gina-untatan sang mga estudyante kag mangin ang mga manunudlo suno sa iya ang halos wala man sang may ginahimo nga aksyon sa pagpang-bully sa iya.
Mahibaluan nga naglapta ang masobra duha ka minutos nga video kun sa diin makit-an ang paghilawas sang duha ka mga estudyante nga nakasuksok pa sang school uniform.
Apang ginkakibot na lamang ni MJ nga siya ang ginatudlo nga babaye sa video kag nangin unod na siya sang huring-huring kag nabiktima pa sang bullying sa ila eskwelahan.
Suno naman sa iloy ni MJ nga si ginang Alma, dismayado ini sa kapaslawan sang pamunuan sang eskwelahan nga tapnaon ang nagakahinabo nga bullying sa buluthuan.
Sang iya ini ginpalab-ot sa guidance office, ginpanugyanan pa siya nga ipaidalom sa medical examination si MJ agud pamatud-an sa mga estudyante nga wala natandog ang iya anak.
Gindugang pa sini nga nasakitan siya para sa iya anak bangud apektado na ang pag-eskwela ni MJ bangud sang ‘bullying’ natuhoy sa butang nga suno sa iya wala man sang kamatuoran.
