ROXAS CITY – Ginbaha ang 15 ka mga barangay sa lima ka banwa sa probinsiya sang Capiz bangud sa wala untat nga pag-ulan humalin pa kahapon.
Kalakip sa mga banwa nga apektado sang pagbaha amo ang Maayon, Sigma, Mambusao, Cuartero kag Dumalag.
Sa interview sang Bombo Radyo Roxas kay Mr. Espiridion ”Speed” Pelaez sang Provincial Disaster Risk Reduction and Management Office Aksyon Tabang, ginpahayag sini nga padayun ang monitoring sang talatapan sa mga ginbaha nga barangay labi na sa banwa sang Sigma, sa diin indi na maagyan sang mga salakyan ang Barangay Dayhagon kag Cogon, Poblacion Norte kag Sitio Balogo, Pagbunitan kag Banggaan.
Apektado man sang pagbaha ang 170 ka mga household sa Poblacion proper sa banwa sang Mambusao, apang nagapabilin pa sila sa ila mga balay.
Ginbaha man ang mga ulumhan sa Barangay Piña, Salgan, Tapulang kag Fernandez sa banwa sang Maayon, Nagba, Bitoon Ilawod kag Ilaya, Angub kag Poblacion Ilawod sa bayan sang Cuartero.
Padayun sa karon ang monitoring sang PDRRMO Aksyon Tabang kag nakastandby ang tanan nga mga response unit.
