Ginbuligan sang Sigma Municipal Disaster Risk Reduction and Management Office (MDRRMO) ang 15 ka mga estudyante sang VASNHS nga nagkinahanglan sang first aid kasunod sang nagluntad nga Magnitude 5.4 nga linog nga nag-igo sa Masbate kag nabatyagan man sa probinsya sang Capiz subong nga aga.
Suno sa MDRRMO, ang mga estudyante nakabatyag sang mass hysteria ukon nag-panic kag nagka-anxiety matapos ang paglinog, gani gilayon sila nga ginhatagan sang nagakaigo nga first aid kag psychological support agud mapakalma ang ila kahimtangan.
Gilayon man nga nagkadto sa lugar si Sigma Mayor Dante Rizal Eslabon agud Tsekyaron ang sitwasyon kag personal nga bisitahon ang walo ka mga estudyante nga gindala sa Sigma Primary Care Facility para sa dugang nga obserbasyon kag pag-atipan.
Nakighinun-anon man ang alkalde sa mga manunudlo kag mga ginikanan sang mga apektado nga estudyante kag nagpabutyag sang pagpasalig nga padayon nga tutukan sang local government ang kahimtangan sang mga kabataan.
Sa pihak sini, ginpahanumdom sang mga otoridad ang publiko nga magpabilin nga kalmado kag magsunod sa mga safety protocols sa tion sang linog agud malikawan ang pagpanic kag masiguro ang kaluwasan sang tanan.
