ROXAS CITY – Nagpositibo sa Coronavirus Disease ukon COVID-19 ang 15 tanan ka mga katapo sang 61st Infantry Battalion sang Philippine Army sa Camp Monteclaro sa Barangay Igtuba, Miagao, Iloilo.
Ini ang ginkompirmar ni Major Cenon Pancito III, tagpamaba sang 3rd Infantry Division sang Philippine Army sang maintervie sang Bombo Radyo Roxas.
Suno kay Pancito nga may isa ka personnel ang nakabatyag sang trangkaso kabangdanan nga gindala ini gilayon sa ospital sa diin ginpaidalom ini sa swab test kag nagpositibo sa COVID-19 virus.
Bilang pagsunod sa protocol ang tanan nga identified close contacts ang ginpaidalom sang swab test para sa COVID-19 test kun sa diin 14 ang nagpositibo samtang ang iban naman nga mga personnel ang ginpaidalom sa quarantine.
Sa nasambit nga mga nagpositibo, tatlo ang nakitaan sang sintomas samtang 12 naman ang nagapabilin nga asymptomatic.
Samtang, gin-athag naman ni Pancito nga wala naman sang personnel nga residente sang probinsya sang Capiz ang nalakip sa mga nagpositibo sa amo nga balatian.
