Arestado ang 15 ka tawo kag ginabanta P1.98 million nga balor sang sakayan, makina, fishing equipment kag mga isda ang nakumpiska sa operasyon batuk sa illegal fishing sa municipal sea waters sang Panay, Capiz.
Ginpatigayon sang Panay Municipal Police Station (MPS) upod ang MENRO-LGU Panay, ang operasyon matapos madakpan sa akto nga nagahimo sang illegal fishing activity nga ginatawag “shipper” ang isa ka boat captain kag 14 ka mga crew, lunsay mga residente sang Carles, Iloilo.
Sandig sa report, wala man sang Mayor’s Permit ang grupo, nga nagalapas sa Municipal Ordinance No. 03-02 ukon Municipal Fishery Code, Series of 2003.
Nakumpiska sa operasyon ang isa ka steel boat nga nagabalor sang P1.5 million, isa ka 8DC9 diesel engine nga nagabalor sang P300,000, fishing net nga may kumpleto nga accessories nga nagabalor sang P150,000, kag ginabanta 150 kilo sang nanari-sari nga isda nga ginabanta may market value nga P30,000.
Naglab-ot naman sa P1,980,000.00 ang kabug-osan nga balor sang mga nakumpiska sa nasambit nga operasyon.
Ang operasyon sa Panay, Capiz amo ang pinakadako nga accomplishment sa kampanya sang Police Regional Office 6 batuk sa illegal fishing sa sulod sang 24 oras.
Suno kay PBGen Randulf T Tuaño, Regional Director sang PRO6, padayon nga ginapasangkad sang kapulisan ang koordinasyon sa mga local government units kag iban pa nga mga concerned agencies agud maproteheran ang baybayon kag matapna ang illegal fishing.
