Arestado ang 15 ka mga wanted persons sa nagkalain-lain nga manhunt operations sa bug-os nga Western Visayas sa sulod lamang sang 24 oras.
Sandig sa report, sa 15 ka mga nadakpan, tatlo ang ginakabig nga yara sa Top 10 Most Wanted Persons, samtang dose naman ang iban pa nga mga wanted persons.
Sa interview sang Bombo Radyo Roxas kay Police Major Lailyn Sencil, spokesperson sang Police Regional Office 6, iya ginpahayag nga nagapadayon ang pagpabakod sang kampanya sang kapulisan batok sa mga indibidwal nga may nagapabilin nga warrant of arrest sa bug-os nga rehiyon.
Suno kay Sencil, may isa man ka Top 2 Most Wanted Person sa municipal level sang Roxas City, Capiz nga nadakpan bangud sang warrant of arrest may kaangtanan sa kaso nga simple arson.
Pahayag pa niya, daku nga bulig ang intelligence monitoring kag ang hugot nga koordinasyon sang nagkalain-lain nga police units agud mapabakod ang kampanya batok sa pag aresto sa mga wanted persons.
Ginpasiguro man sang natungdan nga magapadayon ang pagpatigayon ang ila mga operasyon kag sa pagserbisyo sang warrant of arrest, samtang ginatuman sang kapulisan ang mga nagakaigo nga layi kag ginatahod ang mga kinamatarong sang mga ginadakop.
