Nagbaton sang tig-₱2,000 nga insentibo ang kapin 1,500 ka Barangay Health Workers (BHWs), Barangay Service Point Officers (BSPOs), kag Barangay Nutrition Scholars (BNS) sa syudad sang Roxas bilang pagkilala sa ila padayon nga serbisyo sa komunidad.
Suno sa pahayag sang local government unit, daku ang kontribusyon sang mga BHWs, BSPOs kag BNS sa pagdala sang nagkalain-lain nga health kag social services sa tagsa ka barangay, ilabi na sa paghatag sang nagakaigo nga impormasyon, pagmonitor sang kahimtangan sang mga residente kag pagbulig sa mga programa sang gobyerno.
Ginpahayag man nga bisan boluntaryo ang ila serbisyo sa madugay nga panahon, padayon sila nga nagapangabudlay agud masiguro nga mabaton sang mga pumuluyo ang nagakaigo nga serbisyo sa ila komunidad.
Gani, pinaagi sa paghatag sang insentibo, ginakilala sang local government ang ila dedikasyon kag sakripisyo sa pagserbisyo sa katawhan.
Dugang pa sang mga opisyal, bisan gamay lamang ang kantidad sang insentibo, ginapaabot sini ang pagpasalamat kag suporta sang syudad sa mga frontliners sa barangay nga padayon nga nagaserbisyo para sa kaayuhan sang publiko.
