ROXAS CITY – Nagapadayon sa karon ang rescue operation sang mga otoridad sa Seoul, South Korea, matapos ang nagluntad nga stampede sa Halloween party sa Itaewan district sa nasambit nga pungsod, kagab-i sang Sabado, Oktubre 29, 2022.
Sa interview sang Bombo Radyo kay Miss Noreen Joyce Guerra, Bombo International Correspondent sa South Korea, ginpahayag sini nga 151 na ang nabalita nga patay bangud sa stampede, kapin 70 pa ang yara sa ospital kag may mga nabalhag nga nagkaladula.
Suno diri, may mga abyan ini nga nagpadulong sa amu nga party kun sa diin suno sa ila nga tuman gid kadamo sang tawo nga naglab-ot sa punto nga halos indi na makahulag bangud sa kagutok.
Nahibaluan nga kada tuig ang amu nga selebrasyon apang nauntat ini sa tion sang pandemic, rason nga ini ang labing-una nga kahigayunan nga nagpatigayon sang 3-day Halloween party, matapos ang duha ka tuig nga pagpaiway.
Sa karon, wala man sang reported nga Filipino nga naulamid sa trahedya, apang padayon ang monitoring sang Philippine Embassy sa lugar.
Ginpahayag pa ni Guerra nga kadam-an sa mga nagtambong nga mga napatay ang nagapang-edaron sa 20 tubtob 25-anyos kag paindisanay gid lamang sang Halloween costume ang amu nga aktibidad.
