ROXAS CITY – Yara na sa estable nga kondisyon sa Roxas Memorial Provincial Hospital (RMPH) ang isa ka menor de edad nga lalaki matapos nga ginbuno sang isa man ka menor de edad, sa paubos nga bahin sang Agtalin Church, Barangay Dulangan, Pilar, kahapon nga una nga Sabado sang bulan, Agosto 6.
Sa nakuha nga inisyal nga impormasyon sang Bombo Radyo sa Pilar MPS, nagikan sa isa ka Santos nga Misa ang 16-anyos nga lalaki, residente sang Brgy. Natividad, Pilar, Capiz, kaupod ang iya manghod kag pakaisa nga lunsay mga menor de edad.
Apang sa ila pagpauli, may grupo sang menor de edad nga nagpangdukol sa ulo sang pakaisa sang biktima.
Diri kag nagtugda ang biktima kag nag-umpisa ang pag-ilinaway, tubtob nga ginbuno ini sang 14-anyos nga lalaki nga residente sang Brgy. Vizcaya, banwa sang President Roxas, gamit ang sukbit nga matalom nga bagay.
Bangud diri, nag-angkon sang pilas ang biktima, kag madasig nga nagpalagyo ang suspek, masuwerte nga nadakpan ini sang mga kapulisan nga yara sa lugar.
Bangud sa menor de edad, ginturn-over ang suspek sa paghinakop sang MSWDO-Pilar para sa nagakaigo nga disposisyon.
Ginapahayag nga pagpangtripping ang motibo sa insidente.
