16 ka estudyante sa isa ka eskwelahan sa banwa sang Panit-an, nagkalalipong bangud sa tuman nga init sang tyempo

ROXAS CITY – Nagkalalipong ang 16 ka mga estudyante sa isa ka eskwelahan sa banwa sang Panit-an bangud sa tuman nga init sang tyempo.

Sa interview sang Bombo Radyo kay Mr. Jan Vincent Delfin, Information Officer sang Leodegario Deocampo Sr. National High School (LDSNHS) sa Barangay Capagao sang nasambit nga banwa, ginpahayag sini nga samtang nagapatigayon sila sang regular nga Misa kada bulan sa amu nga buluthuan sang hinali lang nga nagkalalipong ang 16 ka mga estudyante.

Suno kay Delfin, posible nga nakaeksperyensya sang heat exhaustion kag hyper ventilation ang mga estudyante kun sa diin nag-trigger nga nabudlayan ang mga ini magginhawa bangud sa kakulangan sang hangin nga tuga sang tuman nga init.

Gilayon naman nga ginrespondehan sang MDRRMO ang lugar agud mahatagan sang first aid ang mga estudyante nga nagkalalipong.

Dugang pa sini, nagpangayo man sila sang bulig sa Rural Health Unit para sa nagakaigo nga pagbulong.

Sa karon, lunsay yara na sa istable nga kondisyon ang 15 ka mga estudyante samtang ang isa ang padayon pa nga gina-monitor sa RHU sang amu nga banwa.

Ginpanugyanan man ni Delfin ang mga ginikanan nga pabalunan sang madamo nga tubig kag indi gid magkalipat nga magpamahaw ang mga estudyante antes magpadulong sa eskwelahan agud makaangkon sang mabakod nga resistensya sa klase.