Patay ang 16 ka mga indibidwal samtang 58 naman ang pilason sa panibag-o nga serye sang pag-atake sang Israel sa southern Lebanon, kadungan sang ginpagbaskog nga opensiba kag malapnagon nga evacuation orders
Suno sa Lebanon’s National News Agency, anum sa mga napatay ang sakop sang amo man nga pamilya matapos naigo sang Israeli drone strike samtang nagapalagyo sa Adloun Highway nga naga-angot sa Sidon kag Tyre.
Pila pa ka mga insidente sang pagpamomba ang narekord sa Tyre kag kaiping nga mga lugar, kon sa diin ang Israel ginaalegar nga nagpuntirya sa “imprastraktura sang Hezbollah,” apang ang mga residensyal nga lugar kag imprastraktura apektado man.
Sa tunga sang nagaluntad nga tensyon, ang Israel nagpaguwa sang mass evacuation order sa southern Lebanon, lakip na ang Tyre, kon sa diin ang mga pumuluyo gin-evacuate sa northern Zahrani River bangud sang nagapadayon nga military operation.
