Patay ang 16 ka tawo samtang 18 ka iban pa ang pilason sa makahalanusbo nga aksidente sang isa ka depasahero nga bus sa Indonesia, matapos ini nagbunggo sa konkreto nga barrier sa Java main island, kaagahon sang Lunes, Disyembre 22.
Suno sa mga otoridad, padulong kuntani sa syudad sang Yogyakarta ang bus halin sa sentro sang Jakarta sang nagluntad ang aksidente sa curved exit sang Krapyak toll road.
Base sa inisyal nga imbestigasyon, nagtabok ang bus sa kurbada samtang madasig ang pagpadalagan rason nga nadulaan sang kontrol ang driver kag nakabunggo sa concrete barrier.
Bangud sa kabaskugon sang impact, pila ka mga pasahero ang nahulog pa gwa sa salakyan kag naipit sa sulod sang naguba nga bus. Anum ka mga pasahero ang gindeklarar nga dead on the spot, samtang napulo naman ang gindala sa nagkalain-lain nga ospital apang sang ulihi napatay bangud sang ila mga pilas. 18 ka mga pilason ang padayon nga ginabulong, ang iban sa ila yara sa kritikal nga kondisyon.
Samtang, padayon naman ang pag-ayo sa ospital sang driver sang bus matapos makaangkon sang malubha nga pilas sa lawas.
Gin-anunsyo sang mga otoridad nga magapaidalom ini sa drug test kag maid-id nga imbestigasyon agud mahibaluan kun may yara sang paglapas sa speed limit, kapabayaan, ukon iban pa nga kabangdanan nga gintunaan sang aksidente.
