Naglab-ot sa 16 ka tawo ang napatay kag 46 ang napilasan matapos ang magnitude 7 nga linog nga nag-igo sa Baqen County sa Nagqu, Tibet, China.
Sa pinakaulihi nga data gikan sa lokal nga otoridad, 11 sa mga pilason ang yara sa kritikal nga kondisyon samtang 35 naman ang nakaangkon sang minor injuries.
Naglab-ot sa 339 ka mga puluy-an ang narumpag ukon nahalitan.
Narekord ang linog sa kadalumon nga 10 kilometers, samtang ang epicenter sini yara sa Maru Township, ginabanta 70 kilometers gikan sa kapital sang Baqen County.
Nag-crak man ang pila ka dingding sang mga buildings, samtang na-eksperyensyahan ang power outages kag delay sa komunikasyon sa pila ka mga lugar.
Gilayon naman nga ginpadala ang mga rescue team sa mga apektado nga komunidad. Lakip sa mga tikang ang pagpangita sa mga posible na-trap sa mga narumpag nga balay kag paghatag sang medical aid sa mga napilasan.
Ginpahayag man nga may yara sang temporaryo nga pag-untat sang pila ka biyahe sang tren kag pagsirado sang bahin sang isa ka highway bangud sa mga bato nga nagtupa sa dalan.
Padayon naman ang rescue and relief operations samtang ginahibalo pa sang mga otoridad ang kabug-usan nga kadakuon sang kahalitan.
