Magapabilin nga basehan ang 16 ka boto ukon two-thirds vote sang mga senador-judge agud legal nga ma-convict si Vice President Sara Duterte sa iya impeachment trial, sandig sa Konstitusyon.
Sa interview sang Bombo Radyo kay Atty. Joenar Pueblo, President sang Philippine Arbitration in the Visayas, iya ginpahayag nga isa ini sa mga daku nga pagpanghangkat sa Senate Impeachment Court ang pagkuha sang amo nga numero sang boto bangud sa kahimtangan sa numero sang mga senador-judge.
Suno kay Pueblo, mahimo sa gihapon nga malab-ot ang 16 ka boto bangud mahimo makapasakop sa impeachment proceedings ang mga senador nga wala makapartisipar bangud sa detention paagi sa video conference, kaangay sanday Senator Rodante Marcoleta kag Senator Jinggoy Estrada.
Mahimo man ini nga maapektuhan sang pagtinir ni Senator Loren Legarda nga yara sa gwa sang pungsod, samtang ang ginalauman nga indi makapartisipar amo si Senator Ronald “Bato” dela Rosa bangud nagapanago ini may kaangtanan sa warrant of arrest sang International Criminal Court.
Pahayag pa ni Pueblo, kun magkaproblema sa constitutional requirement kag sa pagdeterminar sang valid nga boto, wala na sang iban pa nga remedy kundi ang pagpasaka sang isyu sa Supreme Court agud ini ang maghatag sang pinal nga desisyon.
Nagalaum man ang natungdan nga mangin klaro ang proseso kag desisyon sang Senate Impeachment Court agud masiguro nga masunod ang mga probisyon sang Konstitusyon sa pagdumala sang impeachment trial.
