CAPIZ-Nakabaton sang tag-10 ka kilo nga libre nga bugas ang 1,681 ka manunudlo halin sa Capiz National High School kag mga banwa sang Ivisan, Panay kag Panitan, upod ang 152 ka non-teaching personnel sang Schools Division Office (SDO) of Capiz, sa ginpatigayon nga pagpanagtag sa Capiz National High School sang Oktubre 7, 2026, bilang kabahin sang pagsaulog sang World Teachers’ Day.
Ginpatigayon ang pagpanagtag paagi sa Gobyerno Probinsyal sang Capiz sa pagpanguna ni Governor Fredenil H. Castro, sa pagbuligay sang Task Force Pagdumdum kag Provincial Social Welfare and Development Office (PSWDO).
Lakip sa mga benepisyaryo ang mga manunudlo nga nagahatag sang pagtudlo kag paggiya sa mga estudyante, kag ang non-teaching personnel nga nagasuporta sa administratibo kag operasyon sang mga eskwelahan.
Paagi sa sini nga tikang, ginkilala sang probinsyal nga gobyerno ang kontribusyon sang mga personnel sa sektor sang edukasyon, samtang nagahatag sang dugang nga bulig para sa ila adlaw-adlaw nga kinahanglanon.
Ang pagpanagtag sang bugas kabahin sang mga programa sang Gobyerno Probinsyal nga nagatinguha nga makahatag sang suporta sa mga manunudlo kag iban pa nga personnel nga may importante nga papel sa pagpadalagan sang edukasyon sa probinsya sang Capiz.
