PAMPANGA – Mangin mahinalungon sa pagpakaayo sang naguba nga cellphone ilabi na kun may mga sensitibo ukon pribado nga pictures ukon videos.
Sa Pampanga, isa ka 17 anyos nga babaye ang nabiktima sang ‘sextortion’ kag gilayon man nga naaresto sang mga pulis ang suspek nga nang -blackmail sa dalagita nga ipalapta ang mga pictures kag videos sini kun indi magpakighilawas sa iya.
Ginsulod mismo sang mga pulis ang isa ka kwarto sang isa ka hotel sa Arayat, Pampanga agud arestuhon ang 26-anyos nga suspek.
Nagapanabon lang sang tuwalya ang suspek sang maabtan sang mga pulis samtang ginahulat ang dalagita nga mag-abot.
Sa imbestigasyon sang kapulisan, ginpakay-o sang dalagita sa suspek ang iya nga cellphone kag nakit-an sini ang mga sensitibo nga video kag pictures.
Tubtob nga nakabaton na sang menasahe ang biktima nga nagapamahog nga ipalapta ang mga videos kag pictures kun indi ini magpasugot nga magpakighilawas sa suspek.
Ang suspek ang nagatrabaho sa IT section sang isa ka pribado nga ospital kag naga-sideline bilang cellphone technician.
