ROXAS CITY – Patay na sang nasapwan ang isa ka 17-anyos nga dalagita sa sulod sang iya hulot sa Barangay Tiza, Roxas City.
Base sa pagpangusisa sang Bombo Radyo News Team sa suod nga abyan sang wala na ginhingadlan nga dalagita nga nag chat pa ini sa iya antes ang adlaw nga nasapwan ini nga wala na sang kabuhi.
Ginpahayag pa sang iya abyan nga nagpabakal pa ang biktima sang prutas sa iya.
Bangud diri, nagkadto ang iya abyan sa ila balay apang tuman na lamang ang kakibot sini sang nasapwan nga nagahapa kag wala na sang kabuhi ang biktima sa sulod sang iya hulot.
Madasig naman ini nga nagpangayo sang bulig sa pamilya sang nasambit nga menor de edad.
Gilayon naman nga nagsulod ang iya mga himata sa hulot sa diin ginasubayan na ang bangkay sini.
Dugang pa sang iya nga abyan nga nakasugid pa ang biktima sa iya natuhoy sa problema nila sang iya nga nobyo subongman sa iya nga pagbusong.
Nahibaluan nga anom na ka bulan nga nagabusong ang dalagita kag wala kabalo ang iya mga himata natuhoy diri.
Suno naman sa stepfather sang dalagita nga wala gid sila sang ideya nga nagabusong ang dalagita bangud wala man ini nakasugid sa ila.
Ginpahayag pa sang iya stepfather nga ginpapatpat pa nila ang nasambit nga dalagita sa manugpatpat nga si Manang Anggka.
Ini bangud sa madugay na nga ginabatyag sang biktima sa iya nga lawas rason nga nadesisyunan nila ini nga ipalantaw sa manugpatpat.
Base naman sa paglantaw sang manugpatpat nga ginahampangan ini sang dwende rason nga may yara ini sang ginabatyag sa lawas.
Ginapahayag man nga nadusmo ang dalagita rason nga nakabatyag ini sang pagpalanakit sa iya lawas.
Magluwas diri, nakita man ang pila ka mga lagob sa iya nga lawas.
Padayon naman ang ginapatigayon nga imbestigasyon sang mga kapulisan kag ginahibalo pa ang gintunaan sang iya nga kamatayon.
Mahibaluan nga may yara sang narekober nga mga bulong sa sulod sang hulot sang dalagita apang indi pa mapat-od kun nag-inom ini sang bulong nga amo ang rason sang iya kamatayon.
Sa karon, yara na sa punerarya ang bangkay sang nasambit nga dalagita.
