Pilason ang 17-anyos nga lalaki, matapos ginbuno sa Barangay Aglalana, Dumarao, Capiz.
Ginkilala ang biktima kay alyas “Titoy”, residente sang nasambit nga lugar samtang ang ginatudlo naman nga suspek ang ginkilala kay alyas “Roy”, 24-anyos kag residente sang Brgy. San Juan, sa kapareho nga banwa.
Sa nakuha nga impormasyon sang Bombo Radyo nagikan sa Dumarao MPS, ginapahayag nga samtang nagapungko-pungko ang biktima sa iya motorsiklo, hinali nalang nag-abot ang suspek kag gin-akat ang biktima nga magsakay sa iya motorsiklo apang nagpamalibad ang biktima nga mag-upod sa suspek.
Bangud sa natabo, may nagluntad nga indi pag-intindihanay sa tunga sang magtimbang nga bahin rason nga hinali na lamang nga ginbuno sang suspek ang biktima.
Nag-angkon sang pilas sa tiyan ang biktima tuga sang duwa ka beses nga pagbuno sang suspek nga gilayon naman nga ginpadangat sa malapit nga ospital para mapadapatan sang nagakaigo nga pagbulong.
Madasig naman nga nagpalagyo sa wala matumod nga direksyon ang suspek apang natigayon man ini nga madakpan sang mga tanod sang barangay kag gin-turn over sa mga kapulisan.
Sa karon, yara na sa paghinakop sang Dumarao PNP ang suspek para sa nagakaigo nga disposisyon.
