ROXAS CITY – Tuman ang kasakit sang buot sang isa ka iloy matapos ginaalegar ginkastigo ang iya 16-anyos nga bata nga lalaki sang mag-asawa nga pulis nga lunsay residente sang Roxas City sang Setyembre 14 sang gab-i.
Sa interview sang Bombo Radyo kay alias “Cecil”, iloy sang 16-anyos nga lalaki, suno diri rason sang pagpangkastigo bangud ginapasibangdan ang iya bata nga si alias “Ivan” nga nagmolestya sa 7 ka tuig nga bata nga lalaki sang mga pulis.
Ginsaysay pa ni Cecil ba-se sa nangin pahayag ni Ivan nga papuli na kuntani ini sa balay sang iya stepbrother kun diin siya nagaistar apang wala pa nakalab-ot sa ila balay sang gin-akat siya sang mag-asawa nga magpadulong sa balay sang mga ini sa kapareho man nga lugar.
Wala siya makahibalo kun ano ang rason gani naglaong pa siya suno diri nga magpa-upod sa iya magulang apang wala ang mga pulis nagpasugot.
Sang yara na sa balay sang mga pulis didto kag ginaalegar ginpasibangdan siya nga nagmolestya sa ila bata nga iya man ginpanginwala.
Bangud diri, ginaalegar gintindakan siya sa kilid kag ginsumbag sang lalaki nga pulis kag nagdugang naman tapungol ang babayi nga pulis.
Sa kahadlok, suno diri nag-aku nalang si alias Ivan nga ginmolestya niya ang bata.
Mahibaluan si Ivan kag ang 7 ka tuig nga bata ang mag-abyan kag masami updanay.
Matapos sang insidente, ginsiling sini nga gindala sa police station ang iya bata kag didto gin-interogar sang kapulisan.
Madason naman nga adlaw nahibaluan ni Cecil ang natabo kag gilayon sini ginpadulungan ang iya menor de edad nga bata kun sa diin nakita niya ang pila sini ka lagob sa dughan kag naga-antos sang sakit sang kalawasan.
Dugang pa ni Cecil nga masakit sa iya bilang iloy nga makita ang kahimtangan sang iya bata kag wala siya suno diri nagapati nga mahimo sang iya bata nga molestyahon ang bata sang mag-asawa.
Ginpalab-ot man ni Cecil ang kalain sang iya buot sa mag-asawa nga pulis bangud wala ang mga ini nakig-angut sa ila ukon naghatag sang papeles antes gindala ang iya bata.
Indi man suno diri intsakto ang ginhimo sang mga ini bangud bilang pulis sila dapat ang nakahibalo sang tama nga proseso kun magkasala ang isa ka tawo.
Plano sang iloy nga magpa-blotter apisar suno sa DSWD nga napasakaan na ang iya bata sang kaso, ginahulat niya sa karon ang medical examination result sang iya bata.
