Ginkumpirmar sang Philippine Consulate General sa Hong Kong nga isa ka 17-anyos nga Pinoy ang napatay matapos ini ang nahulog sa taytay sa Peng Chau sang Hong Kong.
Suno sa report, nahulog ang teenager halin sa Chau Tsai Bridge sa Peng Chau kag gilayon nga gindala sa Pamela Youde Nethersole Hospital sang Hong Kong Government Flying Service, Apang, gindeklara ini nga dead on arrival.
Base sa preliminary investigation sang Hong Kong Police, ginapahayag nga wala sang makaduluda nga hitabo ukon ebidensya sang foul play may kaangtanan sa kamatayon sang pamatan-on.
Nagpalab-ot man sang simpatiya ang konsulado sa pamilya sang napatay nga menor de edad.
Kadungan sini, ginhingyo sang ahensya sa publiko nga respetuhon ang privacy sang pamilya sa sini nga tion sang ila pagpangasubo kag likawan ang pagpalapta sang unverified information ukon espekulasyon angut sa insidente.
Padayon ang imbestigasyon sang mga otoridad sa Hong Kong may kaangtanan sa insidente.
