Padayon ang pag-ikog sang mga sakayan nga pandagat sang China sa West Philippine Sea kalakip ang mga barko nga panggyera kag ila nga mga research kag survey vessel, base sa monitoring sang Philippine Navy.
Sa datos sang ahensiya, nasiplatan ang yara sa 178 Chinese ships sa kadagatan sang pungsod, kalakip ang 17 ka mga barko halin sa People’s Liberation Army Navy nga nagalapta sa pila ka maritime feature sang pungsod, kag 2 ka Chinese research kag survey vessels sa Bajo de Masinloc (Scarborough Shoal) sa nakaligad nga 7 adlaw, humalin Setyembre 24 tubtob 30.
Nasiplatan man sa WPS ang 28 China Coast Guard kag 131 Chinese maritime militia vessels.
Matandaan nga gin-anunsiyo sang China nga gin-organisa sini ang ila nga hukbo nga pandagat kag pangkahanginan agud maghiwat sang regular reconnaissance, early warning, kag mga training sa sea kag air patrol sa palibot sang Bajo de Masinloc nga ginaako sang China.
Ginhimo sang Beijing ang nasambit nga training kadungan sang ikaapat nga Multilateral Maritime Cooperative Activity (MMCA) sang Pilipinas kaupod ang United States, Japan, Australia, kag New Zealand sa exclusive economic zone sang Pilipinas.
