Nag-umpisa na subong nga adlaw ang Department of Social Welfare and Development (DSWD) sa pag-distribute sang Emergency Cash Transfer (ECT) assistance sa ginabanta 17,000 nga mga sugar farmers sa Capiz.
Personal nga nagpadulong sa probinsya si DSWD Sec. Rex Gatchalian agud obserbahan kag i-monitor ang payout sang ayuda para sa mga mangunguma nga apektado sang red-striped soft scale insect (RSSI).
Sa exclusive interview sang Bombo Radyo kay Sec. Gatchalian, iya ginpahayag nga ginabanta P170 million ang pondo para sa ECT assistance sang mga mangunguma sa Capiz.
Suno sa iya, direktiba mismo ni President Ferdinand Marcos Jr. nga siguraduhon nga tanan nga apektado sang RSSI sa pungsod ang matatapan sang gobyerno bangud ang mga mangunguma amo ang nagabuhi sang ekonomiya sang Pilipinas.
Nagapati si Sec. Gatchalian nga komprehensibo ang listahan sang mga pangalan sang mangunguma nga naglab-ot sa ahensya bangud nagpakig-angot ini sa mga local government kag provincial agriculture office.
Apang kun may yara sang sugar farmer nga wala malista apang apektado man sang RSSI, nagpangabay ang natungdan nga magpadulong sa agriculture office sang banwa ukon syudad agud makapa-validate.
