Ginabulubanta nga 17,300 ka residente ukon 4,622 ka pamilya sa Pampanga ang kasubong nagapabilin sa 270 ka evacuation centers sa bug-os nga probinsya bangud sa mabaskog kag wala naga-untat nga pagbaha.
Suno kay Pampanga Governor Lilia Pineda, wala pa nalakip sa amu nga numero ang mga residente nga nagpili nga magpabilin sa ila mga puluy-an bisan mataas na ang tubig-baha.
Ginpabutyag sang gobernador nga bisan ang mga lugar nga indi kinaandan nga ginabaha, naabot na man sang tubig bangud sa backflow ukon pagbalik sang tubig nga indi gilayon makaguwa padulong sa Manila Bay.
Lakip sa mga lugar nga pinakagrabe nga naapektuhan ang banwa sang San Simon, diin ginbaha ang pila ka barangay pati na ang bahin sang North Luzon Expressway (NLEX). Nagakinahanglan man sang kabudlayan ang mga awtoridad sa pagpanubo sang tubig bangud nagalibot lamang ini sa lugar sa baylo nga magpadayon nga mag-drain.
Bangud sini, padayon ang pagpakig-angut sang pamunuan sang probinsya sa mga alkalde kag mga opisyal sang barangay agud unahon sa pag evacuate ang mga kabataan, mga may balatian, mga senior citizen, kag mga bedridden nga residente.
Gin-agda naman liwat ni Pineda ang mga residente nga hugot nga magsunod sa mga paandam sang gobyerno kag maghanda sang kaugalingon nga emergency plan ang tagsa ka pamilya agud masiguro ang ila seguridad sa tunga sang kalamidad.
