Isa ka 18-anyos nga babaye ang ginkalbo sa isa ka ilimnan sa Bangkok, Thailand matapos mag-order sang masobra 200 ka botelya sang ilimnon nga nagalab-ot sa 60, 000 baht ukon masobra ₱100,000.
Suno sa report, ginpa-charge sang babaye ang iya nga order sa host sang establisyemento, apang sang tion na nga magbayad, ginpahayag sini nga kulang ang iya kwarta kag ginaalegar nga nagtuyo nga magpalagyo.
Ginpahayag man nga naggamit sang peke nga identification card ang babaye samtang naga-order. Apang, ginpunggan siya sang mga empleyado sang ilimnan kag ginpangayo ang bayad sa iya daku nga bill.
Bangud indi na ini makasarang sa pagbayad sang iya utang, ginpahayag nga nagpasugot ang babaye nga magpagunting sang iya buhok kabaylo sang iya wala mabayaran nga balayran, kon sa diin gingamita siya sang electric clipper sang bartender.
Nangin kontrobersyal ang insidente matapos ginkwestyon sang publiko ang ginhatag nga silot sa babaye.
Bangud sini, nagpatigayon sang imbestigasyon ang Ministry of Social Development and Human Security of Thailand agud hibaluon ang bug-os nga detalye kag kun may yara sang posible nga paglapas sa kasuguan sa natabo nga insidente.
