ROXAS CITY – Nagpangayo sang bulig sa gobyerno ang 18 ka construction workers nga stranded sa Iloilo matapos naabtan sang lockdown sa nasambit nga lugar humalin pa sang Marso sini nga tuig 2020.
Sa interview sang Bombo Radyo kay Ricardo Bojo sang Barangay Punta Tabuc, Roxas City, isa ka construction worker, ginpahayag sini nga masobra isa ka bulan na sila nga nagatenir sa bodega sang ginahimo nga balay sa Ledesco Village, Barangay Tabuc Suba, Lapaz, Iloilo.
Nagakabuhi lamang sila pinaagi sa ginahatag nga relief goods sang barangay sa Lapaz kag tag-iya sang balay kag bodega nga ila ginadayunan.
Suno naman Rey Catalan nga nabudlayan na sila sa ila nga sitwasyon bangud sa flooring sang bodega sila nagatulog kag nagagamit lamang sang karton sa pagtulog.
Ginpasiguro man Catalan sa gobyerno nga handa sila nga magpaidalum sa quarantine kun ini ang kinahanglan para makapauli na sila sa ila mga balay, bangud ang importante nga makaupod na nila ang ila pamilya.
