ROXAS CITY – Nagapaidalom na sa karon sa strict home quarantine sa banwa sang Cuartero ang 18 ka mga locally-stranded individuals (LSI’s) nga gikan sa isla sang Boracay sa Malay, Aklan.
Ini ang ginkompirmar ni Cuartero Municipal Disaster Risk Reduction and Management Officer Ronald Guillermo sang mainterview sang Bombo Radyo.
Suno kay Guillermo nga ginsugat ang nasambit nga mga indibidwal sa Caticlan port kag sa ila pag-abot sa banwa, gilayon sila nga ginpadiretso sa Municipal Health Office.
Diri sila ginpaidalom sa rapid testing kag lunsay nag-negatibo ang mga ini rason nga sila ang ginpanugyanan lamang nga magpaidalom sa strict home quarantine.
Suno diri nga hugot nga iga-monitor sang Barangay Health Emergency Response Team (BHERT) ang nasambit nga mga indibidwal.
Sa nasambit nga 18 ka mga LSI’s, 7 diri ang taga-Barangay Poblacion Ilawod; 4 ang taga-Bitoon Ilawod; 3 ang taga-Agdahon; 2 ang taga-Agcabugao; kag tag-1 sa Angub kag Poblacion Ilaya.
