Indi magnubo sa 18 ka tawo ang napatay sa stampede sa isa ka istasyon ng tren sa India, New Delhi, nga natabo kahapon, Pebrero 15 sang magdus-ukanay ang mga tawo nga makasakay sa mga tren padulong sa pinakadako nga festival sa kalibutan nga ginatawag Kumbh Mela.
Ginahiwat ini kada 12 ka tuig sa Prayagraj, nga nagaganyat sang minilyon nga mga deboto nga Hindu.
Suno sa mga report sang otoridad, ang stampede ang natabo sang magpamilit ang mga deboto nga makasakay sa mga tren padulong sa nasambit nga pista, nga magatakop sa Pebrero 26.
Ginlaragway sang mga local authorities nga ang eksena ang pinakadelikado nga natabo sa istasyon kun ikumparar sa mga nakaligad nga tuig.
Suno naman kay Dr. Ritu Saxena, Deputy Medical Superintendent sang Lok Nayak Hospital sa New Delhi, 15 ka tawo ang nakumpirmar nga napatay sa ospital.
Samtang may 11 nga iban pa nga nagkalapilasan, apang kadam-an sa ila may malala nga kahimtangan kag ang iban nakaeksperyensya sang orthopedic.
Samtang tatlo ang dugang nga gin-report nga napatay. Kadam-an sa mga biktima mga kababainhan kag bata nga naipit sa pagdinus-ukanay.
Suno pa sa isa ka porter nga nagatrabaho sa istasyon sang tren halin pa sadtong 1981, wala pa niya naeksperyensyahan ang kasubong nga hitabo.
Ginpahayag naman ni Railways Minister Ashwini Vaishnaw nga isa ka imbestigasyon ang ila nga ginapatigayon agud hibaluon ang mga rason sang aksidente. Ginmandu sini nga ang mga dugang nga tren ang ipaguwa na halin sa New Delhi agud mabuhinan ang kadamuon sang mga pasahero partikular na sa adlaw sang festival.
Nagpahayag naman sang pagpakig-unong sa pamilya sang mga napatay si Prime Minister Narendra Modi angut sa natabo nga trahedya.
Ginmanduan naman ni New Delhi Governor Vinai Kumar Saxena, ang disaster management personnel nga mag-deploy kag siguruhon nga ang mga ospital ang preparado agud mag-atipan sa mga kinhanglanon sang publiko.
Ang Kumbh Mela ang ginahiwat kada anom ka semana pagtililipon, nga may masobra 500 million nga deboto nga nagatambon halin sang magsugod ini sadtong nakaligad nga bulan.
Indi man malipod nga ang nasambit nga kahiwatan ang may kasaysayan sang mga insidente nga may kaangtanan sa dalagkuan nga stampede, kalakip na sadtong 1954 kun sa diin masobra 400 ka tawo ang napatay, kag isa pa sadtong 2013 nga ginkapatay sang 36 ka persona.
