ROXAS CITY -Tuman ang pagkahangawa sang ginikanan sang 19-anyos nga dalagita sa natabo sa ila anak nga masobra na isa ka bulan nga nagawaras kag kasubong wala sa iya kaugalingon nga paminsaron sa Barangay Libas Roxas City.
Ginpahayag ni Tatay Bobong amay ni Marynel, 19-anyos residente sang nasambit nga lugar nga nagsugod ang tanan sang gin-agda sang inom si Marynel sang kaupod sini sa trabaho nga si Jackelyn Dela Peña sang tinalikdan nga bulan sang Mayo.
Ginkakibot sang amay nga nagawaras na kag wala na sa normal nga paminsaron ang anak sang nagpauli sa ila nga panimalay.
Gindugang pa sini nga walo ka adlaw nga wala sang tulog ang anak kag kasubong nga naga-halucinate nga may yara sang ginakahadlukan.
Nahibaluan nga masobra isa ka bulan man ini nag-ubra sa isa ka bakery shop.
Bangod sini, ginpakamaayo sang ginikanan nga ipaidalum sa drug test ang dalaga apang nagnegatibo man ang resulta.
Nagapati ang ginikanan sang dalaga nga may yara sang wala matumod nga likido nga ginpainom sa anak nga gintunaan sang masami pagwaras sini.
Magluwas diri, natukiban man sang ginikanan ni Marynel nga may yara ini sang mga lagob sa hita.
Ginpakamaayo sang ginikanan sang dalaga nga temporaryo nga ipahamtang ang anak sa Crisis Center sang siyudad.
