Atensyon sa mga mahilig maggamit sa cellphone. Ikaw bala ang tawo nga sa pagbugtaw sa aga, cellphone dayon ang ginapangita?
Hatagi man kun kaisa sang ligwa ang imo kaugalingon gikan sa paggamit sang cellphone kun indi mo luyag nga magpareho sa isa ka 19-anyos nga estudyante sa China nga nangin paralisado bangud sa masami nga pagduko samtang nagagamit sang cellphone.
Gindala sa emergency room ang teenager nga ginkilala kay Xiao Dong, isa ka estudyante sa Quanzhou, China matapos hinali nga nadulaan sang animo kag nadulaan sang ikasarang sa paghulag sang iya mga tiil.
Antes ang insidente, nagabatyag na ini sang pagpang-alay sa liog, butkon, kag tiil.
Suno sa mga doktor, ang dalayon nga pagduko sang ulo sa malawig nga tion ang nagtuga sang halit sa iya spinal canal kag ini ang nagresulta sang hematoma ukon (blood clot).
Kalingawan sang nasambit nga teenager amo ang mobile games kag paggamit sang social media.
Gilayon nga nagpaidalom sa emergency operation si Xiao Dong agud makuha ang blood clot kag malikawan ang permanente nga pagkaparalisado.
Sa subong, amat-amat na niya nga makontrol ang iya mga tiil samtang nagapadayon na nga nagapaayo.
