ROXAS CITY – Ginhilway na sa karsel sang Roxas City Police Station ang 19-anyos nga soltero matapos nga napamatud-an nga wala ini nagkawat sang motorsiklo sa banwa sang Panay, Capiz.
Ginkilala ang nasambit nga persona nga si Justine Brillo sang Barangay Baybay sining siyudad.
Matandaan nga hugot nga ginpanginwala sang nasambit nga soltero nga ginkawat sini ang motorsiklo kag ginpanindugan nga ginbarter niya lamang ini sa social media kay Alexander Martinez.
Nahibaluan nga tuman na lamang ang kakibot sini sang ginpadulongan sang mga kapulisan sa ila nga panimalay kag ginabawi ang motorsiklo nga ginapahayag nga kinawatan.
Sandig sa panayasayon ni Brillo, nagpost ini sa social media nga nagapangita sang motorsiklo nga mahimo butangan sang sidecar.
Nagpadala sang mensahe suno sa iya si Martinez nga nagtanyag sang motorsiklo sa presyo nga P10,000 apang nagpamalibad si Brillo bangud tuman ka mahal ang ginatanyag nga presyo sang suspetsado.
Gindugang pa ni Brillo, nga nagkasugot sila sang nasambit nga suspetsado nga magbayluhanay na lamang sang ila mga motorsiklo.
Apang ginkadismaya sini sang nahibaluan nga kinawatan ang nabaton sini nga motorsiklo gikan sa barter kag gindakop ini sang mga kapulisan.
